5
Selkatien keke avat keil ten sios avatalimal en Kristin tai vasakin Sios onen Iesu Kristo hetolas
Inau naraengoni aviteni keke tei en kami amul amatil vituai musil rendemien tisa tai koa tisaso mok en asa koa koakeil areingeingen Ahi akilea avoumoni. Naraengoni avit meatin tai en kami mul matil ral min ahin onen tata kati onen. Lev 18:7-8; Dut 22:30; 27:20 ?Vensa mimul mivasi kami? Tahos imok munak mivalonge vatisa ven sakien tatisaso koa meatin enek mumoni ka mivasila lati ran sios onami.
Avaseini namul soutin ran kami, en rendemien onak, naro ral min kami. Ka mukonek, inau namul nasan rendemien onak tuai usil meatin koa mumon sakien tatisaso enek. Kol 2:5; Mat 16:19; 18:18; 2Kor 13:10 Sakini, navong mihelah ruai keke mivalei rahit usite onen meatin enek, mihesan mahien mini housil rendemien onak ka hetal min keihoen onen Iesu Kristo, Asuv orer. Mihesila lat meatin enek ran sios onami keke heha mau en hen Temat|Setan. Vahesa mahien koa hekuri hesakini helokovein sakien tatisaso ten aven. Hemukonek, Ahi houtut ninin onen en avong koa Asuv hemai ris eni. 1Tim 1:20; 1Pit 4:6
Navong mivasi kami en hati avong koa mival mivamaen tisaen en kami, koanek romaltei. Veni selusien enek vi anatin koa vit, “Is koa havivis mumon pulaoa vasi retaho.” Kal 5:9 Sakini, mihoumoni hesuval koa amumoni en avong ten Anien ten Mul Laui. En sakien koa amotein is vasi keil ran teim se keke pulaoa ae koa is tovuol ien vatolas, kami mihemotein kami ran tisaen keil onami keke mihetolas. Mihoumoni hemukonek veni, en sakien koa Siu keil telamu amuas sipsip en avong ten Mul Laui keke voutut moulien one, kosa, Kristo, sipsip orer, amuasi tuai. Eks 13:7; 12:21; Aes 53:7; 1Pit 1:19 Sakini, en moulien orer, hesuval koa romul romumon Anien ten Mul Laui ral min sien. Ka rehelei kati keke ronoumontei natal is ten tisaen, koa vi sakien ten vurohien ka sak kalkalien keil. Vuo, rehoumoni hetal min veret koa is hetovuol ien, hesuval koa rehetolas ka rehousil anatinien. Eks 12:3-20; 13:7; Dut 16:3
En leta koa namutisi min kami tuai, naviteni min kami keke minalah ruaitei natal meatin keil koa amumoni tisa en ave ral min meatin sav keil. Mat 18:17; 2Tes 3:14 10 Navong naviteni mukok, narmundemtei keke minahatei vesesal ven koakeil areingeingen Ahi koa amum tisa en ave, avi metenan, avenan tounah vuo uva netan min nana keil. Veni munak hemukonek, mihemea ran out netan varei, ka misakras. 11 Aneite ten selusien koa namutisi mukok, minahatei vesesal ven koakeil avit avi tuomi keil en demkatien ka amum tisa en ave ral min meatin sav, avi metenan, avenan tounah, avi uti munmunien, avit usil meatin sav, vuo uva netan min nana keil. En vati meatin koa mukonek, minamaentei kei nalah ruai ka naaniantei natal min kami. 2Tes 3:6; Taet 3:10; 2Sion 1:10 12-13 Veni, en koakeil amul hae en sios, rovitei inau keke malei rahit usite keil ten moulien one. Ahi varei helei rahit usite one. Ka koakeil amul en sios onami, mal keke mihelei rahit usite keil ten moulien one suval koa Tus Votut viteni koa vit, “Miheso lat meatin tisa ran kami.” Senesis 17:7 Mak 4:11; Dut 17:7; 19:19; 22:21,24; 24:7

5:1: Lev 18:7-8; Dut 22:30; 27:20

5:3: Kol 2:5; Mat 16:19; 18:18; 2Kor 13:10

5:5: 1Tim 1:20; 1Pit 4:6

5:6: Kal 5:9

5:7: Eks 13:7; 12:21; Aes 53:7; 1Pit 1:19

5:8: Eks 12:3-20; 13:7; Dut 16:3

5:9: Mat 18:17; 2Tes 3:14

5:11: 2Tes 3:6; Taet 3:10; 2Sion 1:10

5:12-13: Mak 4:11; Dut 17:7; 19:19; 22:21,24; 24:7