8
Iesu san anien min meatin keil koa amulin taosen ehat (4000) Mat 15:32-39
En avong sav eris, meatin keil houlu amusil Iesu ka umai en out tas. Ka navong anien ae vus, Iesu vise meatin teindan elu (12) onen umai veni ka viteni min keil vit, “Ek mahis meatin keil ekek veni keil aro ral minau en avong etel (3) tuai, ka tounah tovuol avaanian. Munak nisila keil iha ris en teim se ka irkaniantei, ave hememerau ka mete hemalikelik en sise, veni keil koa aka soutin.”
Ka teindan elu (12) onen avisi avit, “Romul en out volvol. ?Rokilea rovahotin anien en out kave koa vinvin rovasani min meatin keil ekek?”
Iesu vis keil vit, “?Veret ehis mikur kati?”
Keil avit risi mini avit, “Veret oulu (7) enges.”
Evus, Iesu viteni min meatin keil vit avatondan. Kur veret, san masmasien min Ahi, ka vul vahasi. Evus, sasani min meatin teindan elu (12) onen vit avatiti min meatin keil, ka amumoni. Ka mesau havivis akur kati. Iesu san masmasien min Ahi ven mesau, ka viteni min onen keil keke avatiti min meatin keil. Meatin vasi keil akanian vinvin, vange vil. Evus, meatin teindan elu (12) onen akur mari veiat oulu (7) ka alah revi soke anien koa mules. Meatin taosen ehat (4000) akanian en avong enek. Akanian evus, Iesu sila keil avaha ris en teim se. 10 Evus, Iesu vut va en vot ral min teindan elu (12) onen ka uva amu koteh Mari Oai ten out Kaleli, uva en out sav koa avise en ‘Dalmanuta.’
Farasi keil avis Iesu voumon mari tounah tai vatie lati keke kei ka ven Ahi anatin Mat 16:1-4
11  Farasi keil umai ven Iesu ka amul amusel mini. Keil e vati avahotin anatinien usili. Sakini, avisi keke voumon etai merikel vatal min keihoen ten out nesa avalesi. Mat 12:38; 16:1; Luk 11:16; Sion 6:30 12 Navong keil avisi mukok, Iesu longe tisa ka viteni min keil vit, “?Vensa meatin keil ten avong kosa avis etai merikel keke avalesi? !Ka vuo, nirmumon etai tounah ilesi vasakin keil avakur anatinien enau vaka ien!” Mat 12:39; Luk 11:29
13 Sakini, Iesu lokovein keil, vut va en vot ral min meatin keil onen, ka uva en usi oai.
Iesu sel kat meatin keil onen keke ilei kat revi keil ven hihiseien onen Farasi ka Satusi keil Mat 16:5-12
14 Navong keil uvut en vot, meatin teindan elu (12) onen arendem kilea keke e vobongeni avakur kat veret vavinvin en keil, akuri heite tas. 15 Ka navong amul veah en vot, Iesu sel kat keil vit, “Mihelei kat kami, mihelele revi en is* En avong onen Iesu, Siu keil akur ‘is’ suval niniven tai ten tisaen. onen Farasi keil ral min is onen Asuv Herod.” Luk 12:1
16 Koanik sakin keil amul aselus min keil eris aviteni avit, “Kei viteni mukok veni rorkurtei veret vatal min ir.”
17 Ka Iesu mundem kilea asa koa amul avit usili. Sakini, vis keil vit, “?Vensa mimul miselus usil veret ar koa tovuol? ?!Mireingeingeni veah!? ?Anatin keke rendemien onami koteh veah? Mak 6:52 18 Metomi mul, ka mirlei kileatei tounah. Ralingomi mul, ka mirlong kileatei tounah? Selusien enek ka en Ser 5:21, ka hekatau eni, en 5:22, Ahi viteni vit “Inau navi Ahi Asuv. ?Vensa mirvouhoutei minau?” ?Emi vobongen Esek 12:2; Mak 4:12; Umen 28:26 19 avong koa navul vahas veret elim keke nasani min meatin taosen elim (5000)? ?Kami misien veiat ehis koa avilelau en soke anien keil?” Mat 14:15-21; Mak 6:35-44; Luk 9:12-17; Sion 6:5-13
Keil avit risi avit, “Veiat teindan elu (12) vil mules.”
20 “?Ka navong navul vahas veret oulu (7) min meatin taosen ehat (4000), misien veiat ehis koa avilelau en anien koa mules?” Mat 15:32-38; Mak 8:1-9
Keil avit, “Veiat oulu (7) vil mules.”
21 Ka vis keil, “?Mukonek, vensa varei kami mirkileatei veah aneite ten tounah keil enek?”
Iesu sakin metovar tai ten out Betsaeta mai lele eris
22 Navong uva en out Betsaeta, meatin keil akur metovar tai mai ven Iesu ka apeahi keke vatokoli. Mak 7:32-33 23 Iesu vuli kat meatin enek ka mulamuni lumea ran meteimal. Evus, mutiv kat meten ka ling hen mul ien ka visi vit, “?Mukave, kokilea kovales etai tounah?” Sion 9:6
24 Ka meatin enek lele rahiti ka viteni vit, “Nales meatin keil asuval vatiai keil koa amul akaikai.”
25 Sakini, Iesu ling ris hen mul en meten. Evus, meatin enek lele va ka lei kilea keke meten mai tahos, lei kilea tounah vasi. 26 Evus, Iesu vit koe vit, “Konahatei ris en mari meteimal, ka kika mal varei kiha teim.”
Pita vit lati keke Iesu vi Mesaea koa Ahi vat kati keke hesani hemai Mat 16:13-20; Luk 9:18-21
27 Evus, Iesu ka onen keil uva en meteimal keil koa amul vesesal en out Sesaria-Pilipae. Ka navong amul semau en sise, vis keil vit, “?Meatin keil aviteni avit inau navi meatin sei?”
28 Keil avit kesi avit, “Meatin koa avit keik kovi Sion Baptis. Ka meatin koa mun avit keik kovi provet Ilaetsa. Ka keil koa mun avit keik kovi tai en provet keil telamu.” Mak 6:14-15; Luk 9:7-8
29 Ka vis ris keil vit, “?Mukave en kami? ?Mimundemi mivit inau navi isei?” Sion 6:69
Ka Pita mea ka vit, “Keik kovi Mesaea koa Ahi vat kati.”
30 Ka Iesu vit koe keil keke anahitentei min meatin keil keke kei vi Mesaea. Mak 9:9
Iesu vit luvat mahien, matien, ka mearisien onen ran matien Mat 16:13-20; Luk 9:18-21
31 En avong enek, Iesu vit leini min meatin teindan elu (12) onen vit, “Natin Meatin hekur mahien imok hehi houlu, ka meatin houlu iseseini: elda keil, asuv keil onen pris keil, ka tiser keil ten mengkatien onen Mosis. Keil u vini. Evus, en avong etel, hemoul eris ran matien.” Mat 17:12; Mak 9:12; Luk 17:25 32 Kei vit vasin tounah min keil. Ka Pita kur seheni havivi, ka vul kati keke nahitentei mun namukonek. 33 Ka Iesu viles, lei rahit meatin keil onen, ka selus keih min Pita vit, “!Temat, kiha ranau! !Rendemien onom musil rendemien onen meatin keil ten out netan, ka romusiltei rendemien onen Ahi!”
34 Evus, Iesu vise meatin keil ral min teindan elu (12) onen umai vituai veni ka vit, “Munak keik tai em vati kovousil inau, kisesein moulien onom, kihous aiveave onom, ka kusil inau. Mat 10:38; Luk 14:27 35 Veni munak kihuli kat moulien onom, hevuol ranuk. Ka munak kimaen moulien onom hevuol venau ka ven more longlongien onen Ahi, kikur moulien koa vi anatin. Mat 10:39; Luk 17:33; Sion 12:25 36 ?Munak kokur tounah vasi ten out netan, ka moulien onom hevuol, koanek tahos enuk? !Vuo! 37 Tounah tovuol kovasani keke kovakur ris moulien onom koa sakras vavus. 38 Meatin keil ten avong kosa avilelau en tisaen ka amum tisa houlu ral min tounah ten out netan. Ka munak kimemou enau ka hihiseien keil onak, Natin Meatin emun hememou enuk navong hemai ris hetal min angelo keil onen ka hetal min muohien koa Tamen hesani mini.” Mat 10:33; Luk 12:9

^ Mat 15:32-39

8:10: Mat 16:1-4

8:11: Mat 12:38; 16:1; Luk 11:16; Sion 6:30

8:12: Mat 12:39; Luk 11:29

8:13: Mat 16:5-12

*8:15: En avong onen Iesu, Siu keil akur ‘is’ suval niniven tai ten tisaen.

8:15: Luk 12:1

8:17: Mak 6:52

8:18: Selusien enek ka en Ser 5:21, ka hekatau eni, en 5:22, Ahi viteni vit “Inau navi Ahi Asuv. ?Vensa mirvouhoutei minau?”

8:18: Esek 12:2; Mak 4:12; Umen 28:26

8:19: Mat 14:15-21; Mak 6:35-44; Luk 9:12-17; Sion 6:5-13

8:20: Mat 15:32-38; Mak 8:1-9

8:22: Mak 7:32-33

8:23: Sion 9:6

8:26: Mat 16:13-20; Luk 9:18-21

8:28: Mak 6:14-15; Luk 9:7-8

8:29: Sion 6:69

8:30: Mak 9:9

8:30: Mat 16:13-20; Luk 9:18-21

8:31: Mat 17:12; Mak 9:12; Luk 17:25

8:34: Mat 10:38; Luk 14:27

8:35: Mat 10:39; Luk 17:33; Sion 12:25

8:38: Mat 10:33; Luk 12:9