Tangoa New Testament 1 Corinthians 1
1 Corinthians
Tiroma Leta
Paul Mo Ulia Isana Mara
Corinth
Leta Nike
Leta akerihi mo usuri leta na tinapua matea Paul mo ulia isana mara Corinth moiso (5.9), hin leta nike Paul mo r̃arami na nora retiusia sei la sohaia isana moiso (7.1). Corinth enia taon tavera jea matea na pahisa tasi Greece. Vao kalesia Corinth la patumasa, la lo aseasera (1.10–4.21). Mo r̃arami na retiusia mata lahi (7.1–40), mata hanhani sei la silea isana tamasi (8.1–13), mata posposi tataholo mata lotu (10.1–14.40), peresi na sauteterahi non Iesu peresi na nona tamlohi usuri (15.1–58). Paul mo verea isara mara opoia mo aulu jea, mo jeu na rasua peresi na r̃omtoho matan enia i pa toho jejeu (13.13).
Hin Leta Nike
1. Tiroma Retireti Non Paul (1.1–9)
2. Paul Mo Verea Mara La Turu Jara Matea (1.10–4.21)
3. Mauri Na Vao Kalesia (5.1–7.40)
4. Posposi Tataholo Mata Vao Kalesia (8.1–11.1)
5. Posposi Tataholo Mata Lotu God (11.2–14.40)
6. Kr̃isto Mo Aulu Na Mateia (15.1–58)
7. Silesilea Nona Kalesia Jerusalem (16.1–4)
8. Paul Mo Hahau Corinth Mata Sava (16.5–12)
9. Retioloolo Non Paul (16.13–24)
1
Retioloolo Non Paul Isana Kalesia
Enau Paul, na vahar̃ule non Kr̃isto Iesu usuri na masalon God, peresi vorair̃a Sosthenes, kama sohai leta nike isana vao kalesia non God Corinth, isana tapuhi hin Kr̃isto Iesu, God mo tovi kamim tapuhi peresi la haratu na jara tari sei la lo lotu Moli Iesu Kr̃isto, nora Moli, ale enia nor̃a Moli,
r̃omr̃uhu peresi na tamata la tai isan God Tamar̃a, peresi Moli Iesu Kr̃isto, la vano isamim.
Paul Mo Vere Meje Isan God
Na lo vere meje isan God tarea matamim matan r̃omr̃uhu sei God mo silea isamim hin Kr̃isto Iesu, matan enia mo vai kamim ka ulua mo r̃uhu hinia na retireti tari peresi na lelevosahi tari, harihi mo vujangia vara sava na verea isamim matan Kr̃isto mo varar̃uhu na maurimim, matan vara ka sopo vejuveju hin te otori sei Tanumen God mo lo silea, ale ka lo kilau matan rani atu nor̃a Moli Iesu Kr̃isto i pa mele pala hinia, enia i pa vai na nomim rasua i r̃ilangi i kakau na isoisona, i pa sopo tea i er̃i tuvai kamim hin te hinau hin rani atu non nor̃a Moli Iesu Kr̃isto. God enia i sopo er̃i tope na nona retitauhi, God mo tovi kamim vara ha tapala peresi Natuna, Iesu Kr̃isto, nor̃a Moli.
Patumasa Na Lolo Vao Kalesia
10 Na lo usia r̃ilangi isamim la voraiku peresi na vevoraiku, na hijan nor̃a Moli Iesu Kr̃isto, vara kamim mo isoiso nomim reti i matea, ale i sopo te patumasa isamim, pani ha matea na r̃omr̃omi matea, ale ha matea na nomim ari. 11 Matan la voraiku peresi na vevoraiku, na rongo na reti matea mo tai na vaon Chloe vara, kamim ka lo vasvas isamim. 12 Na lo verea matan vonamim hai la lo verea lara, “Enau na usuri Paul!” tea la vara “Enau na usuri Apollos!” tea la vara “Enau na usuri Peter!” moiso tea la vara “Enau na usuri Kr̃isto!” 13 Ha er̃i topetope Kr̃isto? Paul mo mate na talopeilopei matamim? Teni ka lavi na paptijo na hijan Paul? 14 Enau na lo vere meje isan God matan enau na sopo paptijo hin te vonamim hatea, pani Crispus peresi Gaius purongo, 15 matan vara i pa sopo te vonamim hatea i er̃i verea vara enia mo lavi na paptijo na hijaku. 16 Varar̃uhu, na paptijo na vao iman Stephanas, pani korong na sopo mele paptijo hin te tinapua. 17 Matan Kr̃isto mo sopo r̃uleau vara a paptijo, pani vara a retivujavujangi na Retir̃uhu ale mo sopo hin te reti mo r̃ilangi mata levosahia, vara i vono talopeilopei non Kr̃isto i pa sopo te r̃aramina.
Lelevosahi Non God
18 Matan reti mata talopeilopei enia hina rongorongo vono isan la haratu la lo vano na komokomo, pani isar̃a sei r̃a juri hinia, enia suihan God. 19 Matan Isaiah mo ulia vara,
‘Enau a pa komo na lelevosahi
nona tamlohi lelevosahi,
ale a pa vai na r̃omr̃omi nona tamlohi lelevosahi
i mai hina purongo.’ Isa 29.14
20 Nene tamlohi lelevosahi? Nene tamlohi vujangi mata leu non God? Nene tamlohi mo er̃i retireti na varama nake? R̃a er̃i verea vara God mo vai na lelevosahi nona tamlohi mata varama la mai hina rongorongo vono purongo. 21 Matan usuri na lelevosahi non God, God mo taua vara tamlohi na varama, la sopo er̃i lavutia na nora lelevosahi purongo. God mo avulahi vara i juri la haratu la rasu na hina rongorongo vono sei kama lo retivujavujangi hinia, 22 matan Jew la lo usia r̃ilangi vara God i vai te matamata vara la hitea ale la pa rasua, ale tamlohi r̃or̃oha la opoi vara la ale na lelevosahi vara la rasua, 23 pani kamam kama lo retivujavujangi na mateia non Kr̃isto na talopeilopei, enia hina tialahalaha matea isana Jew, ale enia hina rongorongo vono isana tamlohi r̃or̃oha sohena mara Greek. 24 Pani isar̃a sei God mo tovir̃a, hina purongo vara enr̃a Jew teni tamlohi r̃or̃oha, enr̃a r̃a er̃i hitevosahi na suihan God peresi na nona lelevosahi r̃uhu hin Kr̃isto. 25 Matan hina rongorongo vono non God enia mo jeu na lelevosahi nona tamlohi, ale hinau non God sei tamlohi la verea vara mo sopo te suiha hinia, enia mo jeu na suiha nona tamlohi.
26 Ale la voraiku peresi na vevoraiku, ha to r̃omr̃omia vara hin rani atu God mo tovi kamim, mo sopo te matuvana isamim ka tamlohi lelevosahi na naho tamlohi, mo sopo te matuvana ka tauri na suiha, mo sopo te matuvana ka vora tamlohi aulu. 27 Pani God mo vir̃oni na hinau la rongorongo vono na varama matan vara i vai na tamlohi lelevosahi la mahanuhanu; ale God mo vir̃oni na hinau sei mo sopo te suiha hinira na varama vara i vai na tamlohi suiha la mahanuhanu. 28 God mo vir̃oni na hinau la atano na varama, tamlohi la hiter̃esira, hinau mo sopo te hinau hinira, mo vaira matan vara i vai la hinau sei tamlohi la lo verea vara la hina aulu, la mai hina purongo, 29 matan vara tea i pa sopo er̃i retihapahapa na nahon God.
30 Enia pulo maurimim hin Kr̃isto Iesu. God mo vai Kr̃isto enia nor̃a hina lelevosahi, enia natu, mo vair̃a r̃a tataholo na nahon God, ale enia malele mata vair̃a r̃a tapu, enia mo hase silea vara i volituhur̃a. 31 Ale matan haratu sohen la ulia vara,
‘Mo r̃uhu vara haratu mo lo retihapahapa,
i pa hapahapa hin Moli.’ Jer 9.24