Tangoa New Testament 1 John 1
1 John
Tiroma Leta
John Mo Ulia
Leta Nike
John mo opoia vara tamlohi la rasua vara God i pa r̃omir̃a hin rani atu vara la taviti na nor̃a hehe (1.9).
Tamlohi la vujangia vara la rasua varar̃uhu vara la lo opoi opoira (3.11–24). Matan God enia opoia, nona tamlohi varar̃uhu la pa sohena (4.1–21). Vara tamlohi rasua la jeu na nora hehe la pa hahau na malelen opoiopoira, ale la rasua vara Iesu Natun God enia Jujuri varar̃uhu mo mai tamlohi vara i mate matar̃a (5.1–12).
‘Reti matan mauri atu
mo lo toho tuai tiroma
na pongi tiroma,
… haratu kama hitea na matamam’ (1.1)
Hin leta nike
1. Reti non God mo sile na mauri (1.1–4)
2. God enia malarani, Kr̃isto enia nor̃a tovongi (1.5–2.6)
3. Retileu paro (2.7–17)
4. Meresahi non Kr̃isto peresi na tamlohi non God (2.18–3.10)
5. Opoia non God peresi na nor̃a opoia (3.11–4.21)
6. Jeu na varama (5.1–21)
1
Reti Sei Mo Sile Na Mauri
Kama lo vereuli kamim na reti mata mauri atu mo lo toho tuai na pongi tiroma, haratu kama rongoa, haratu kama hitea na matamam, ale haratu kama kilaua, ale kama tikelia na limamam tataholo, mauri atu mo pala, kama hitea, ale kama lo vereuli na sava kama hitea moiso. Nake, kama lo vere kamim hin mauri tui atu, haratu mo lo toho peresi God Tama, ale nake mo asi isar̃a. Kama lo vere varar̃uhu na sava kama hitea, ale kama rongoa matan vara ha pa er̃i lavi na mauri tui sei peresi kamam, moiso enr̃a r̃a pa matea peresi Tama enia Natuna, Iesu Kr̃isto. Kama lo uli na hinau tari isamim matan vara ha pa avulahi jea.
God Enia Malarani
Haranike enia Retir̃uhu kama rongoa isana, ale kama lo verea isamim: God enia malarani, ale mo sopo te r̃or̃oha hinia.
Vara r̃a verea vara r̃a lavi na mauri peresi God, ale r̃a lo toho na r̃or̃oha, enr̃a r̃a lo halu, r̃a sopo hahau usuri na retivarar̃uhu. Pani vara r̃a lo hahau na malarani sohen God mo lo toho na malarani, enr̃a r̃a pete pulutahi hin mauri atu moiso peresi na tatuar̃a, ale r̃aen Iesu Natuna mo lo hoje nar̃ihi na nor̃a sasati. Vara r̃a verea vara mo sopo te nor̃a sasati, r̃a lo halur̃a haser̃a, ale retivarar̃uhu mo sopo toho isar̃a. Vara r̃a taviti na nor̃a sasati isan God, God i pa vai na hina tataholo sohen mo verea isar̃a moiso mara, i pa r̃omi na nor̃a hehe, ale i pa vai na nor̃a hehe tari la sopo vair̃a r̃a lumiha na nahona.
10 Pani vara r̃a verea vara r̃a sopo vai te hina sasati, r̃a lo verea vara God enia tamlohi halu matea, ale nona reti mo sopo toho isar̃a.