Tangoa New Testament 2 John 1
2 John
Harua Leta
John Mo Ulia
Leta Nike
John mo uli leta nike, matan vara tamlohi rasua la pa er̃i levosahia vara opoia enia hina aulu na mauri rasua. Mo vujangia vara opoia peresi na retivarar̃uhu la pa toho jara matea na mauri rasua. Mo vujangia vara Iesu enia tamlohi varar̃uhu matea. John vujangia vara enr̃a r̃a pa opoiopoir̃a.
Hin leta nike
1. Retioloolo (1–3)
2. Opoia peresi na retivarar̃uhu (4–11)
3. Isoiso reti (12–13)
1
Leta nike, enau patu tamlohi rasua sei John, na ulia isan har̃ai sei God mo vir̃onia peresi na natuna.* har̃ai peresi na natuna: reti sei har̃ai peresi na natuna la verea vara John mo lo r̃aramia vara har̃ai atu enia vao kalesia matea, ale natuna enia vao kalesia matan vao kalesia atu. Enau peresi la haratu la levosahi na retivarar̃uhu, kama opoi kamim mo isoiso. Kama opoi kamim mata retivarar̃uhu mo lo toho na mapur̃a, ale i pa toho atu na pongi tui. Moiso na usiusi vara God Tama peresi Natuna Iesu Kr̃isto vara la pa r̃omr̃uhu hinir̃a, ale la r̃omopoir̃a, moiso vara la pa siler̃a na nora tamata, na nora retivarar̃uhu, ale na nora opoia. Enau na avulahi tavera matan na rongoa vara te natum la lo oloolo na retivarar̃uhu sohen God Tama mo retileu hinia isar̃a moiso.
Tamlohi Vujangi Haluhalu
Vetasiku r̃uhur̃uhu, na sopo uliuli vara a vereho vara o pa oloolo hin te retileu paro hatea, mo vono, pani na lo uli haratu mo verea tiroma moiso vara r̃a opoiopoir̃a. Opoia varar̃uhu enia vara r̃a vai na sava God mo retileu hinia moiso, ale haratu ka rongoa moiso na tapulo rani, vara r̃a pa hahau hinia. Matan ka levosahia vara tamlohi haluhalu matuvana la vano na varama moiso. La tamlohi haluhalu atu la retihalu vara Iesu Kr̃isto mo sopo mai tamlohi varar̃uhu. La tamlohi haluhalu atu enira meresahi non Kr̃isto. Ha lo kilau matara! Mo sopo r̃uhu vara sava kama voko r̃ilangi matana matamim i vano hina purongo, pani ha vaihitea vara ha lavi vevuhi na nomim otori isana. Haratu r̃omina mo lo vano asau na hinau la vujangia hin Kr̃isto moiso, ale mo sopo turu hinia, haratu natu, God Tama mo sopo lo toho peresia. Pani vara tea mo toho jejeu na sava hinau la vujangia moiso, God Tama peresi Natuna la pa lo toho peresia. 10 Vara tea i mai, pani mo lavi na vujangi tinapua, ha sopo tinar̃ihia vara i unu na imamim, ha sopo silea na retioloolo, 11 matan, vara haratu mo sile na retioloolo isara, enia mo lo tuenira na nora hehe.
Isoiso Retioloolo
12 Varar̃uhu na opoia vara a mele vere kamim na hinau matuvana, pani na sopo opoia vara a uli na leta purongo. I pa mele r̃uhu vara a mai vara enr̃a tolu r̃a pa sorasora, ale r̃a pa avulahi tavera matana. 13 Reti oloolo mo lo mai isamim mo tai isan la natun vetasimim nike God mo vir̃onia.

*1:1: har̃ai peresi na natuna: reti sei har̃ai peresi na natuna la verea vara John mo lo r̃aramia vara har̃ai atu enia vao kalesia matea, ale natuna enia vao kalesia matan vao kalesia atu.