Tangoa New Testament 2 Thessalonians 1
2 Thessalonians
Harua Leta
Paul Mo Ulia Isana Mara
Thessalonica
Leta Nike
Hin leta nike Paul mo lo vere meje isan God matan nora rasua mo lo ulua (1.3), hina purongo vara la lo lavi na rani r̃ilangi, pani Paul mo verea mara God mo lo vaihite na nora rasua (1.4–5).
Kalesia hai Thessalonica la lo r̃omr̃omia lara Paul mo sohai na leta isara moiso mara Moli mo mele pala moiso (2.2). Pani mo vono, Paul mo retir̃oar̃oahaira vara la sopo tinar̃ihia vara tea i halura sohena matan Iesu i pa sopo pala matan te hinau la pa masese tako (2.3–12).
Paul sohena mo lo retir̃oar̃oahaira matan vara la sopo toho purongo (3.6–10), ale vara la lo kilau vara tea i r̃ohu vara i oloolo na nona reti hin leta nike.
Paul mo verea mara God i pa sile na talai tavera isan la haratu sei la r̃ohu vara la rasu na nona reti hin pongi atu mo lo mai:
‘Ale matana, God i pa sohai na hina haluhalu isara, matan vara la pa rasu la hinau haluhalu atu. Matan vara enira mo isoiso la pa lavi na talai matan la sopo rasu na retivarar̃uhu, matan la lo avulahi na hehe la lo vaira.’ (3.11–12)
Hin Leta Nike
1. Retioloolo (1.1–2)
2. Moli i pa ari na varama (1.3–12)
3. Moli mo sopo mele pala (2.1–12)
4. Turu r̃ilangi tarea (2.13–17)
5. Ha usiusi, ha voko (3.1–15)
6. Isoiso usiusi (3.16–18)
1
Tiroma Reti
Enau Paul na uli leta nike isamim vao kalesia Thessalonica hin God Tamar̃a peresi Moli Iesu Kr̃isto, Silas peresi Timothy la lo toho peresiau nike.
R̃omr̃uhu peresi na tamata mo tai isan God Tama peresi Moli Iesu Kr̃isto i pa toho isamim.
Paul Mo Vere Meje
La vorai peresi na vevorai, tarea mo tataholo vara kama vere meje isan God matamim, ale mo tataholo matan nomim rasua mo lo ulua mo tavera, ale nomim opoia isamim hatehateahi mo lo tavera jea. Mo vai kamam kama lo retihapahapa matamim isana vao kalesia tinapua sei la rasu God mata nomim turu r̃ilangi peresi na nomim rasua na rani tipahi tari peresi na rani r̃ilangi ka lo lavira. Harihi mo vujangi na aria tataholo non God, matan vara i vai kamim ha tataholo mata ha lavi mauri atu God mo aulu hinia, sei ka lo lavi na rani r̃ilangi matana. Matan mo tataholo vara God i sile na rani r̃ilangi isan la haratu sei la lo sile na rani r̃ilangi isamim, ale God i pa sile na mapu isamim sei ka lo lavi na rani r̃ilangi sohemam hin rani atu Moli Iesu i pala na tuka. Enia i pa mai peresi na nona angelo suiha jea, na pepe hapu tavera jea vara i lavi na talai tavera i silea isan la haratu la sopo levosahi God peresi la haratu sei la lo r̃ohu vara la oloolo na Retir̃uhu non nor̃a Moli Iesu. Nora talai i pa vaikomokomora i sopo te isoisona, la pa toho mata rani tui tui hasera asau na nahon God peresi na mera suihana tavera jea, Isa 2.10 10 hin rani atu vara Iesu i mele mai vara i lavi na hasohaso isana nona tapuhi sei la tau na nora rasua hinia, la pa mar̃urahi tavera matana, matan ka lo rasu na nomam retisohai isamim.
11 Matan haratu kama lo usiusi tarea vara nor̃a God i pa vai kamim ha tataholo mata lavi mauri atu mo tovi kamim matana, ale matan vara i tueni kamim na suihana mata vai vevuhi na nomim hinau r̃uhu tari peresi na vavahinau ka lo vaira mata rasua, 12 matan vara hijan nor̃a Moli Iesu i pa lavi na hasohaso hin kamim, ale kamim hinia, i usuri na r̃omr̃uhu non nor̃a God peresi Moli Iesu Kr̃isto.