Tangoa New Testament Acts 1
Acts
Vavahinau
Non
Tanume Tapu
Puku Nike
Harihi enia tapala puku peresi na Retir̃uhu sei Luke mo ulia. Hinira Luke mo uli mamahuni na hinau tari Iesu mo lo vaira mo tikeli rani atu mo sahe na tuka (1.1–2). Na tapulo puku nike mariviti Iesu i pa sahe na tuka, ale mo retileu isana nona tamlohi mara la pa lo sasaovi Jerusalem mata Tanume Tapu (1.8).
Iesu mo sahe na tuka, ale vao kalesia la unu hin mauri atu God mo supe hinia na jara tari na varama hin pongi atu (2.1–35). Jew la lo r̃omr̃omia lara enira hasera purongo la tamlohi non God, pani puku akerihi mo vujangia vara Tanumen God mo mai mata tamlohi r̃or̃oha sohera.
Iesu mo pala isan Paul mata vironia vara i mai nona volitusi (9.1–22). Paul mo hahau mata lavi na Retir̃uhu i vano isana jara tamlohi r̃or̃oha ale tamlohi matuvana la mai la kalesia matana. Jew la opoia vara la pa vilimateia, pani na isoisona Paul mo lavi na Retir̃uhu mo kakau Rome (28.16–31).
Hin Puku Akerihi
1. Retir̃uhu Mo Ulua Jerusalem (1.1–8.3)
2. Tanumen Tapu Mo Jovi Hinira Judea Peresi Samaria (8.4–12.25)
3. Tiroma Hahau Non Paul (13.1–14.28)
4. Council Tavera Nona Kalesia Jerusalem (15.1–35)
5. Harua Hahau Non Paul (15.36–18.22)
6. Hatolu Hahau Non Paul (18.23–21.16)
7. La Taurilati Paul Jerusalem (21.17–23.22)
8. La Lavi Paul Mo Sivo Caesarea (23.23–26.32)
9. Paul Mo Sahe Rome (27.1–28.31)
1
Retitauhi Mata Tanume Tapu
Theophilus, na noku puku tiroma na uli na hinau tari Iesu mo tapulo vaira, ale mo lo vujangira mo kakau hin rani atu God mo lavi nar̃ihia, mo sahe aulu na tuka, sei tiromana mo sile na nona retileu hin Tanume Tapu isana nona vahar̃ule sei mo vir̃onira.
Hitahun na nona rongohaji, mo mele hase vujangia isara vara mo mele mauri na malele tinatinapua matuvana hin la rani atu, mo ngavulu vati atu sei mo lo sorahi mauri atu God mo aulu hinia isara. Tiroma sei mo pa lo toho peresira mo verea mara, “Ha sopo malue Jerusalem pani ha lo saovi tako mata sava na pete verea isamim moiso sei vara Tama i pa r̃ule na Tanume Tapu, i mai isamim. Matan John tamlohi paptijo mo paptijo na wai, pani i pa sopo tuai ha pa paptijo na Tanume Tapu.”
Iesu Mo Mele Sahe Na Tuka
Hin rani atu vahar̃ule la lo toho peresi Iesu, tarea la lo usia isana lara, “Moli, engko o pa turu na nom suiha mata supe aulu hin Israel pangisa?”
Iesu mo verea isara mara, “Mo sopo tinar̃ihia vara ha levosahi na ranin hinau sei Tama hasena mo taua usuri na masalona. Pani kamim ha pa lavi na suiha hin rani atu vara Tanume Tapu i mai hin kamim, ale kamim ha pa noku tuetueni hin Jerusalem, na jara tari Judea, Samaria, i tikeli na isoiso jara tari na varama.”
Hitahun la hinau atu mo lo verera, ale lara la pa lo kilaua, palona mo tinar̃ihi na lepa mo lo sahe aulu, ale telangi matea mo lavi nar̃ihia mo tihai na nahora, 10 ale la pa lo tar̃a la lo tar̃engia mo lo sahe na tuka, ale vahatea purongo, tamlohi mo rua la ru la ruru lulu jea la lo turu na pahisara, 11 ale la verea lara, “Mara Galilee, mata sava ka lo turu nike, ka lo kilau sahe na tuka? Iesu akerihi sei God mo lavi nar̃ihia isamim, mo sahe na tuka, i pa mele sinai sohen harihi ka lo hitea mo lo sahe na tuka.”
Matthias Mo Lavi Na Jaran Judas
12 Hin rani atu hinau atu mo masese vahar̃ule la lo toho na Vuti talu Olive mariviti kilometre matea hin Jerusalem, ale la mele hilu la vano Jerusalem. 13 Ale lara la unu Jerusalem, la vele sahe aulu na jara tinapua matea hin ima atu sei la lo toho ea hin rani atu:
Peter
John
James
Andrew
Philip
Thomas
Bartholomew
Matthew
James natun Alphaeus
Simon sei, enia tamlohi matea mata valum mata jarana,
peresi Judas natun James.
14 Enira mo isoiso la tau na r̃omira mata usiusi jara matea tolu na har̃ai tinatinapua hai peresi Mary tinan Iesu tolu na tasin Iesu.
La Vir̃oni Matthias
15 Hin rani atu, Peter mo lo turu na livuhan la tamlohi rasua atu, ale vao atu mariviti i ngav sangavulu ngavulu rua (120) la lo pulutahi hin jara atu, ale mo verea isara mara, 16 “La vorai, sava Retitapu mo verea vara i pa masese isan Judas, Tanume Tapu mo verea tiroma moiso na jingon supe David mara, enia i pa tiroma hin la haratu la pa taurilati Iesu. 17 Matan enia mo vir̃onia peresir̃a, ale enia vonar̃a matea na nor̃a vavahinau.
18 Ale tamlohi akerihi mo voli na lepa matea na voli nona hehe. Mo vele mo sahe na pesapesa, ale mo jovi patuna mo tiroma mo vujahi r̃ar̃ihi na pangena, ale tinena tari la mar̃ava. 19 Mara Jerusalem tari la rongoa, ale la tau na hijan jara atu vara Akeldama: na leora mo vara, ‘Lepa Mata R̃ae’.
20 Matan David mo ulia na nona puku na psalm mara, ‘Ha tinar̃ihia vara jara nona toho i puru, ale i sopo tea i toho hinia’. Psa 69.25 Ale mo mele verea mara, ‘Ha vir̃oni te tamlohi tinapua i lavi na jarana’. Psa 109.8
21 Ale nakerihi, r̃a pa mele vir̃oni te tamlohi tinapua hatea vara i lavi na jaran Judas, enia i pa tamlohi matea mo lo toho peresir̃a tarea hin rani atu Moli Iesu mo lo toho peresir̃a, 22 mo tapulo hin rani atu sei John tamlohi paptijo mo tapulo paptijo mo mai mo tikeli rani atu Iesu mo mele sahe na tuka — enia i pa vonar̃a matea sei mo hite na nona sauteterahi.”
23 La vere na tupra rua, matea enia Joseph la tovia Barsabbas teni Justus, ale haruana enia Matthias. 24 Ale la usiusi lara, “Moli, engko ko levosahi na mapu tamlohi tari. O vujangi kamam hin haratu sei ko vir̃onia 25 vara enia i pa lavi na jaran Judas peresi na nona vavahinau, matan enia mo vano na nona talai.” 26 Ale la reve na hijara, ale mo jovi isan Matthias, ale Matthias mo mai vahar̃ule matea peresi la haratu mo sangavulu r̃omana matea.