Tangoa New Testament Matthew 1
Retir̃uhu Hin Iesu Kr̃isto
Matthew
Mo Ulia
Hin Puku Nike
Hin puku nike, Iesu mo vujangi sohen harihi, haratu mo vaia aulu na Vutivuti (5.1–7.28), nona usiusi (6.9–13), peresi na ‘Leu R̃uhu’ (7.12) ‘ha vaia isana tinapua sohena ka opoia vara la vaia isamim’ la lo toho hin puku akerihi.
Matthew mo uli mamahuni na hija pin Iesu (1.1–17) mo vujangia vara enia natu haratu sei God mo retitauhi vara i pa tai isan Supe David, haratu i pa nor̃a Tamlohi Jujuri.
Matthew mo uli na sava mo masese hin rani atu Tiapolo mo vaihite Iesu na jara hasetoho (4.1–11).
Titileu nike la lo toho hin puku akerihi purongo
1. Piri r̃uvu (13.24–30)
2. Tavtav Tavera (13.44)
3. Hur̃utavila Tavera (13.45–46)
4. Tara Maji (13.47–50)
5. Tavtav Matea (13.52)
6. Volitusi Sasati Matea (18.23–35)
7. Tamlohi Isa Grape Matea (20.1–16)
8. Uluvou Mo Rua (21.28–31a)
9. La Har̃ai Maevo Atu (25.1–12)
Matthew mo vujangia vara hinau tari la masese isan Iesu usuri na masalon God (1.22; 2.5, 15, 17, 23; 8.17; 12.17; 13.35; 21.4; 27.9). Matthew mo uli retileu atu non Iesu mata sile na vavahinau non nona tamlohi usuri mata vano na jara tari na varama (28.18–20).
Vujangi Hai Hin Puku Nike
1. Pin Iesu Peresi Na Nona Rani Vora (1.1–2.23)
2. Vujangi Non John Tamlohi Paptijo (3.1–12)
3. Paptijo Non Iesu Peresi Na Nona Rani Vaihite (3.13–4.11)
4. Iesu Mo Lo Toho Na Jara Tavera Matan Galilee (4.12–18.35)
5. Mo Malue Galilee Mo Sahe Jerusalem (19.1–20.34)
6. Isoiso Wik Non Iesu: Nona Mateia (21.1–27.66)
7. Iesu Mo Mele Mauri (28.1–20)
1
Pin Iesu
(Lk 3.23–38)
Reti nike mo vereuli na pin Iesu Kr̃isto, mahapin Abraham enia Supe David.
Abraham enia taman Isaac.
Isaac enia taman Jacob,
ale Jacob enia taman Judah
tolu na voraina,
Judah enia taman Perez
peresi Zerah, ale tinara Tamar,
Perez enia taman Hezron,
ale Hezron enia taman Ram,
Ram enia taman Amminadab,
Amminadab enia taman Nahshon,
ale Nahshon enia taman Salmon,
ale Salmon enia taman Boaz,
ale tinana Rahab,
Boaz enia taman Obed,
ale tinana Ruth,
ale Obed enia taman Jesse,
Jesse enia taman Supe David,
Supe David enia taman Solomon,
ale tinana Bathshiba
enia malepun Uriah sei,
Solomon enia taman Rehoboam.
Rehoboam enia taman Abijah,
ale Abijah enia taman Asaph,
Asaph enia taman Jehoshaphat,
Jehoshaphat enia taman Joram,
Joram enia pin Uzziah,
ale Uzziah enia taman Jotham,
Jotham enia mahapin Ahaz,
ale Ahaz enia taman Hezekiah,
10 Hezekiah enia taman Manasseh,
Manasseh enia taman Amos,
ale Amos enia taman Josiah,
11 Josiah enia pin Jechoniah
tolu na tahisana,
enira hasera purongo natu
la pa lo mauri hin pongi atu
mara Babylon la tauri
na tavtavuin Israel
la lavira la vano Babylon. 2 Ki 24.14–15
12 Hitahun rani atu mara Babylon
la lavira la vano,
ale pina mo vano sohen harihi:
Jechoniah enia taman Shealtiel,
ale Shealtiel enia taman Zerabbabel,
13 Zerabbabel enia taman Abiud,
Abiud enia taman Eliakim,
ale Eliakim enia taman Azor,
14 ale Azor enia taman Zadok,
Zadok enia taman Achim,
ale Achim enia taman Eliud,
15 Eliud enia taman Eleazar,
Eleazar enia taman Matthan,
ale Matthan enia taman Jacob,
16 ale Jacob enia taman Joseph,
Joseph enia tuan Mary,
ale Iesu mo vora isan Mary,
enia haratu la tovia Kr̃isto.
17 Ale mo sohena natu, pin Abraham mo tikeli Supe David mo tikeli 14, ale pin Supe David mo tikeli rani atu la vano Babylon mo tikeli 14, ale pina hin rani atu tamlohi la vano Babylon mo tikeli na rani Kr̃isto mo vora mo tikeli 14.
Pongi Vora Non Iesu
(Lk 2.1–7)
18 Ale reti vora non Iesu nor̃a Kr̃isto mo sohen harihi: Tinana Mary, la tapuhia vara i pa naroun Joseph, pani la sopo lo lahi pani o er̃i hitea vara Mary mo tau natuna moiso na suihan Tanume Tapu. 19 Joseph sei enia i pa tuan Mary, ale matan enia tamlohi vokevoke matea, mo sopo opoia vara i vai Mary i mahanuhanu, ale mo aleale malele vara i tinar̃ihia, ale tea la pa sopo levosahia.
20 Pani Joseph mo pa lo r̃omr̃omia, ale vahatea purongo, angelo non Moli God matea mo pala isana na mavuho, ale mo verea mara, “Joseph pin David, o sopo matahu vara o lavi Mary naroum. Hina rihirihi sei na lolona mo tai isan Tanume Tapu. 21 I pa vasusui na natirihi lamane matea, ale o pa tau na hijana vara Iesu matan enia i pa juri na nona tamlohi na nora hehe.” 22 La hinau nike, la masese matan vara i mar̃ivisi na sava Moli God mo verea isana pr̃ovet tuai sei mara,
23 ‘Eh! Har̃ai maevo matea i pa pangepange, ale i pa vasusui na natuna lamane matea.
La pa tau na hijana vara Immanuel.’
Isa 7.14
R̃aramin hija atu enia, ‘God mo lo toho isar̃a’.
24 Hitahuna Joseph mara mo turu, mo vai na sava angelo atu non Moli God mo lo verea, ale mo lavia narouna, 25 pani mo sopo juruvi peresia mo mai mo tikeli na rani mo vasusui na natuna lamane matea, ale mo tau na hijana vara Iesu.