Southeast Ambrym Bible 1 Samuel 1
1 Samuel
1
Poten na Provet Samuel
1 Samuel 1:1-28; 2:11, 19-21, 26
Vatei, e taon tahal Ramah xa de vathu xil xa di tan tahal Efrem, moletin tei teta en, hisen Elkanah. Xi tehe nat Seroham, xa tehe nat Elihu, xa tehe nat Tohu, xa tehe nat Sup, xa testal texo vatimol xa mahulong na Efrem. Elkanah, teleh atou tehe lu, Hanah xal Peninah. Peninah tepes horamue xil e Hanah tenapes ti.
E huram xil vus, Elkanah tetel nan xil latexo taon tahal Ramah e labe taon tahal Saeloh tengan xi ti imot mi Iahova ti isa sanien nan xil mini. E rute ak, pris lu luteti en, hisealu Hopni xal Pinias xa lutehe nat pris Ilae. E melele xil ngasen xa Elkanah tesa sanien nan, nggusil sexien nen, rute teha mi Iahova, rute teha mi pris xil, e rute xa tehe an. Di, xi teseti mi ngan xil xa ladi nim man. Mi Peninah e horamue e atuli nan xil, xi di teseti momal e xil vus. E ngan xa tesa ni mi Hanah tehe eilep mak mu, vengan xa eheien nan teti en teli, tave ti neta xa Iahova tasikoe xole tengan napes ti horamue. Peninah xa bit xi mak mu mili Hanah, xi tesak purun ni e tepol ni unounen mini vengan xa Iahova tepol ni tehe lumalum. Peninah di tepol temak mini e huram xil ngasen. E melele xa di latehe Nim Tavolin na Hi, Peninah tepol ni Hanah telonge tesa teha vuma ... temuis e tehit naxanian ti. E melele xa tiramue nan, Elkanah, di tepusi temak, tesisi tehit, “?Hanah, midep? ?Di omuis veneh? ?Veneh ma obit onaxanian ti? ?E pe metom, inou natavos ti vali ngan xa horamue nam xil lave holu?”
Vatei, latehe Saeloh e latesa sanien nae e Nim Tavolin na Iahova. E melele xa langganien bus, Hanah mitamea e be vangit Nim Tavolin na Iahova tengan vasis. E melele nen tak, pris Ilae di dotan e von totanen nan sangas visal puiteh e pusi. 10 Hanah milonge misa pupu, e melele xa di misis mi Hi, di muis. 11 Hanah pol ni hitxatien tei xa nggeih del Hi bit, “!O Iahova, uketeh upus nou li xa nabe atou te polien nam! Uketeh upus longpangasien navan li, e iem isae e nou. !Iem nabong ni nou ti li! Nabit xati minuk xa xosxa usa tuvava tova xa ihe malohos minou, ma nisa rilomun ni minuk ihe eo e meulien tevi nan. E nipisin ni ihe reitin ixo rin xa ti vari li ninakot hilin.” *
12-13 Hanah di misis mak be nousav e misep nunu tang. Vulongen di minggelial e tangalen teni tastal ti. Misak ni, pris Ilae xa di mile mah xati minemi bit Hanah mumun. 14 Ma biteni mini bit, “?Opol ni sexien te munien ak ha vuma ivus vileh? !Bus tak! !Munien nam valel!”
15 E Hanah bit rilomun ni mini bitene, “E-e, inou natamu ti oei te xeih. Nada misa, e di nasis nabit rat longpangasien navan mi Iahova. 16 Onanemi ti onahit inou nabe atou tei xa misa. Di nasis mak vengan xa tinok pangas e nalonge misa holu pupu.”
17 Ma Ilae biteni mini bit, “Uha itel tomat, e nasis mi Hi tahal Isrel tengan isa naha xa xouk otetak kesi ven.”
18 Hanah bit rilomun ni mini bitene, “Namesuk. E dit unem ihos minou li.” Di, mistal ba e talonge ti mun vasa, ma mingganien vuteili.
19 Ut milan makoe, Elkanah del nan xil lamea tamu nousav e labe Nim Tavolin na Hi. E melele xa lamot mi Iahova bus, ladilomun labe tim sae e taon tahal Ramah. Melengien vahis mitavi, Elkanah pat del atou nan Hanah, e Iahova misa huit sisen nan mini. 20 Ma xi di ni tuvava e milingi be malohos. Di, miling hisen be 'Samuel' xa koute teni be 'nasis Hi ven', vengan biteni bit, “Inou nasis Iahova ven.”
21 Di, e melengien xa momal teni, Elkanah e nan xil labue xat xil tengan lave taon tahal Saeloh va lasa sanien nae xil vatel sanien tei mun xa Elkanah tehit xati mi Iahova. 22 E ngan sung ak, Hanah tave ti. E biteni mi tiramue nan bitene, “Melele xa horamue ak iling sus, inou nihuri sung ha nisa ni mi Iahova, e itavie vari, itanga e Nim nan.”
23 Elkanah bit rilomun ni mini bit, “Bos tang. Upol ni ixoni ngan xa di onemi iaxai. Utat e tim ha ituxoh melele xa tuvava nam iling sus. Bos xa Hi ipol ni hitxatien nan mei istal minuk.” Ma Hanah da nga tim, di milaxat horamue nan.
24 Huram vahis mei mitavi, e horamue ak miling sus. Ma, ninen ngguri lube Saeloh del xat bul tei xa huram nan tol, bak pulaoa tei, e valit uaen tei xa eilep. Hanah ngguri be Nim Tavolin na Iahova e Saeloh, tave ti neta xa xi be tutut horamue tang. 25 Elkanah del Hanah ba lubas bul ak e lusa ni mi Hi. Di, lunggur tutut horamue nalu ba lupisen ni mi pris Ilae. 26 E Hanah biteni mini bitene, “?Xouk opus kil nou? Reitin mak, inou iaxa otepus nou natesoh inggak e di natesis mi Iahova. 27 Natesis ve horamue ak, ma xi misa huit sisen navan. 28 Misak ni, taxeak di nasa ni mi Iahova. Ma e meulien tevi nan, xi ti ipol mi Iahova.” Di, xil lamot mi Iahova e rute ak.

*1:11: