2
Ninin Eo Bemei e Moletin Xil xa Laneket e Iesu
Melele xa melengien te anien xa lakesi ni 'Pentekos'* bemei, moletin xil vus xa laneket e Iesu lamei ladi vituei e nim tei. Vatakes, lalong tangalen tei nggo ut nesao bemei nggoni votiang tei xa mu nggeih. Tangalen ak mise sen nim xa ladotan ladi en. Di, neta tei mistal e nim ak xa pili nggoni upang, e mitasil ba misoh e vat xil kekes. Xil vus mei lapolu ni Ninin Eo, e misa xeihen mi xil misak ni xil di lasepin nggo sepinien sav xil xa tave nae xati ti.
E melele nen ak, Siu xil xa neketen nae nggeih e Hi latexo kantri xil ngasen e ut etan lamei e Serusalem tengan lamot mi Hi e melengien te Pentekos. Melele xa moletin xil ak lalong tangalen ak, holu lamei vituei e rute ak. E melele xa lalong sepinien nae xati xil xa nggo ngan xil xa laneket e Iesu, latemanin ni. Xil lamesep pupu e lasis xil labitene, “!Ei, moletin xil xa di lasepin iaxai, xil vus labe ngan Kaleli xil tang! ?Midep ma ralong xil di lasepin nggo sepinien nar xati xil? Xir rabe ngan Partia, Midia, e Ilam; ngan Mesopotemia, Sudea e Kapadosia; ngan Pontas e Esia; 10 ngan Prikia e Pampilia; ngan Isip e rin xil xa be Libia sangas visal Saerin. Rute ngan xir langgo Rom, ngan xil labe Siu xati, e rute sav ngan xil xa langgusil xat Rae na Siu xil. 11 E rute xir mun labe ngan Krit e Arebia. !E tave ti neta xa ranggo ut sav xil holu, e xir vus di ralong xil di lasepin e sepinien nar xati xil nggusil holesok xil xa tellep pupu xa Hi di tepol ni!” 12 Xil vus latemanin e lanem tova tang. Ma lasis pilei xil mun labitene, “?Netak, koute teni midep?”
13 E rute xil lasep pepamen ni ngan xil xa laneket e Iesu labitene, “!Moletin xil xai lamun tova tang!”
Pita Misetu mi Moletin Xil
14 Di, Pita misoh del eloheoh sav xil xa labe tei e le (11) e mikei nggeih ba ni vanut moletin xil ak bitene, “Xir xa rabe Siu, e xamim vus xa mudi e Serusalem, muteong ni nou e nihit koute te netak mi xamim. 15 Moletin xil ak latamun ti vaxoni ngan xa di munemi. Taxeak be naen klok makoe tang. 16 E-e, naha xa mupusi nggoni ngan taxa provet Soel teke mese ni tetiamu tehit,
17 'Hi biteni bit, 'E melengien xil xa sangas ni Vongkor,
inou nisa Ninin Eo navan mi moletin xil ngasen.
Horamue e atuli namim xil
ti like mese ni sepinien navan.
Horam maxoe xil
ti lipus hisit metuveen melele xa latapat ti,
e momatu namim xil
ti lipus kil neta mun ixo metuveen melele xa lapat.
18 E melengien xil ak, inou niteh rat Ninin Eo navan
mi moletin navan xil vus ituxoh tiramue e atou xil mun xa labe slev tang.
Xil mun, ti like mese ni sepinien navan xil.
19 Inou nipol ni holesok xil xa tellep listal e tilang hat,
e nipisen xeihen navan e ut etan.
E ut etan, nipol ni holesok xil listal ixoni melele te vaeen:
ra ileh, upang e eas ituvan ut ngasen.
20 E tilang hat, meteneai mei imaluxoluk,
e aveti imei ipili ixoni ra.
Melele xa lipus holesok xil ak ivus, melengien na Hi Suv xa mahulong pupu mei istal xa mei ilepis moletin xil vus.
21 E ngan xil xa litak kes nou ve tutouen,
inou niteh meulien e xil.'
 
22 “!Toxoli xil tahal Isrel, muteong ni sepinien xil ak! Melele xa Iesu tahal Nasaret teti tamu mi xamim, Hi tepisen ni tememese tang mi xamim xa xi iaxa tehosei. Xamim mukil xa Hi tehosei vengan xa misa xeihen mini tengan ti ipol ni merekel xil e holesok sav xil xa tellep pe valnaomi xa misak ni mutemanin. 23 Nggusil lingxatien nan, Hi xa mikil holesok xil ngasen xa mistal teling Iesu pe hemim. E xamim, mutehasi temat melele xa mutesi petine moletin xil xa latahusil ti Rae xil na Hi tengan ha liti xati ite eivave. 24 Di, Hi tepol ni temea rilomun ra maten tengan naxulehi ti nate pangasien teni. Vengan xeihen te maten misakras vahur xati. 25 Ngan ak nggoni ngan xa Suv Toto Deved tesep usil Iesu tetiamu tehit,
'Vehakut, napus Hi Suv de riuk metu.
De sangas visal nou,
ma inou, leok tamulul ti.
26 Mak, ma inou tinok memaal,
nasa memesien ba mini.
E naling nenesien navan tengan isikoe xol tiei navan.
27 Reitin, nakila xa namaen ninin navan ti nate von maten.
Namae ni ti tiei na moletin eo nan navolel ti e vul.
28 Xi pisen suse xa nimeul ixo en.
Nihesi nou vehakut,
vengan xa de sangas visal nou.'”
 
29 Pita biteni mun mi xil bitene, “Toxoli xil, inou nihiteni imal tang mi xamim usil avu nar, Deved: xi temat, e latetihin ni e von tehinen nan xa da tak duxoh xosali. 30 Rakila xa xi tehe provet tei. Xi tekila xa Hi tepol ni hitxatien tei te xeih mini xa ipol ni vatimol tei nan mei ihur voninen, ihe Suv Toto.§ 31 Suv Toto Deved pus kil naha xa Hi ipol ni e melengien xil xa ti imei. Ma misep usil mea rilomunen na Kristo melele xa tehiteni tehit,
'Hi naling xi ti nate von maten,
e namaen ni ti tiei nan navolel ti e vul.'*
 
32 Hi tepol ni Iesu temea rilomun ra maten, e xamem vus matepusi. 33 Hi tepet rati tehe ut nesao ba de rin metu, e Tamen tesa Ninin Eo mini nggoni ngan taxa tehit xati. Taxeak, naha xa mupusi e mulonge be Ninin Eo nen tak xa xi misa ni mi xamem. 34 Rakila xa tenave Suv Toto Deved ti iaxa tehe ut nesao. E xi vari tang tesepin usil Kristo melele xa tehit,
'Hi Suv biteni mi Suv navan bitene,
“Utotan e riuk metu,
35 ituxoh melele xa niling ngan xil xa laketeh misa ni xouk liti pe hem.”
 
36 “!Misak ni, moletin xil vus tahal Isrel ti likil kuhi mak xa Iesu, xi iaxa Hi pol ni be Kristo e be Suv nar, xi vari muteti xati e eivave!”
37 Melele xa moletin xil lalong sepinien ak, iexil bon e tine muis. Ma lasis Pita del eloheoh sav xil mun labitene, “?Tua xil, xamem mupol ni itep?”
38 Ma Pita biteni mi xil bitene, “Xamim kekes muhiles ra tesaen xil namim e mumae ni xamem muterir ni xamim e oei e his Iesu Kristo. Mak, ma Hi ileh rerat tesaen xil namim e iketeh ihos mun ni xamim. Ma isa Ninin Eo ihe sanien tei nan mi xamim. 39 Mupol ni imak vengan xa Hi tepol ni hitxatien ak mi xamim e mi horamue namim xil; e mi ngan xil vus xa ladi sotin. Hi Suv tehit xati xa isa Ninin Eo nan mi xil ngasen xa xi ikes xil limei lihe moletin nan xil.”
40 Pita misel xat xil nggeih ni sepinien sav xil mun. Xi di dak kes xil bitene, “!Musis Hi iteh meulien e xamim ra longpangasien xa isa ni imei mi moletin tesa xil te xosali ak!” 41 Di, moletin xil holu lake reitin e sepinien nan, ma lamae ni eloheoh xil laterir ni xil e oei. E melengien nen ak, moletin xil laduxoh taosen tol (3000) mei lamos del ngan xil xa laneket e Iesu. 42 E melengien xil ngasen, moletin xil ak di langgusil xat sexien xil ak: lamei vituei, lateong xat naha xa eloheoh xil di lapispisi ni mi xil, laseti anien mi xil, langgur Anien Eo na Suv, e di lasis.
Sexien na Ngan Xil xa Laneket e Iesu
43 Melengien xil hau tetavi, Hi di tepol ni merekel xil e sexien xil holu xa tellep texo he eloheoh xil. Tesak ni moletin xil vus latetemanin ni, e latemerere ni Hi. 44 Ngan xil vus xa lateneket e Iesu, latexulehi mei di latehe vituei, e di lateso viton holesok nae xil tengan ti litutou ni ti e xil xa latehe tamure ni neta ngan. 45 Tesak ni rute ngan xil latepos ni tan nae mu rut holesok nae xil, e latesa vatu teni ba tetutou ni ngan xil xa latehe tamure ni neta. 46 Melengien xil ngasen, mei lateti vituei e vioh te Nim Eo na Hi e di lateanien vituei e tim sae xil. Latepol tetel memaalen e tetel tinae hos. 47 Di latepet rat Hi, e moletin xil vus di latemerere ni xil. E vehakut, Suv Iesu di tesak ni moletin hao mei latemos e xil e lateneket en, e xi di teteh meulien e xil.

*2:1:

2:21:

2:28:

§2:30:

*2:31:

2:35: