Southeast Ambrym Bible Siob 1
Siob
1
Tumulen usil Meulien na Siob
Siob 1:1-5
Tetiamu nousav, moletin tei tete e kantri tahal Us, hisen Siob. Xi tehusil xat kuh Hi e di temot mini vehakut. Xi tehe moletin hos tei xa sexien nan temese tevi e texuxou kuhi ve sexien nan xil vengan en ti tenavei tengan vapol vasa. Horamue nan xil latehe lu e he sav (7) e atuli nan xil latehe tol (3). Sipsip san xil latetuxoh taosen lu e he sav (7000), kamel san xil latetuxoh taosen tol (3000), buluk san xil latetuxoh taosen tei (1000), e dongki san xil latetuxoh handred lim (500). Moletin te polien nan xil mun latehe holu xa latehe holu. E rute ak xa tete ist, xi vari iaxa holesok nan xil tehe holu teli ngan teisav xil mun.
Horamue nan xil, vehakut xil kekes di latepol ni anien xil xa tellep. Melele xa tei e xil pol ni anien tei e tim san, misilasil ni tuneli sav xil del tunahin xatel lamei. Melele xa langganien e lamun bus, xil ladilomun labe tim sae xil. E tave nousav ti, ngan teisav mun pol ni mak tang ba duxoh ngan nen xa be lu e he sav (7) e xil. E melele xil vus xa langganien bus e latasil, Siob di misa sepinien ba mi xil tengan ha lisak moten meulien nae. Di, e makoe roroh dutou ni anien xil vus xa tellep xiak, xi mitamea e ba misa kekes ni sanien eo ve rin nae ba mi Hi. Siob tepol mah ni temak tengan vasak ni xil lamese rilomun pe met Hi, vengan tenemi tehit xos tova e xil mitamras e tepol ni neta tova xa tesa pe met Hi.
Hi Maen Temat Tengan Vasak Pis Siob
Siob 1:6-22
Vatei, e ut nesao, masxaxa xil ba lasoh pe met Iahova, e Temat mun be xil. Ma Iahova misisi bit, “?Xouk onggo xave omei?”
Temat bit rilomun ni bit, “Nanggok, naba xor, e naborang e ut xil ngasen e ut etan.”
Ma Hi misisi bit, “?Xouk otepus moletin hos te polien navan xa hisen Siob? Moletin tovuol e ut etan di valong xat nou e vamal vaxoni xi. Xi di mot minou e di mingguxou kuhi ve sexien nan xil tengan napol ni ti neta nasa.”
E Temat bit rilomun ni mini bit, “?Midep? ?Onemi obit Siob iti ni ngan taxa ti imot minuk xosxa uleh rerat tuxolxatien nan xil ihe reling meulien nan? 10 Vehakut, xouk di osikoe xole del ngenen xil e holesok nan xil vus. Di oduxol xati e holesok xil vus xa xi di pol ni, e di osak ni vongoro san xil mun mei labe holu xa labe holu, lase vuol ni rute xil ngasen. 11 E xosxa uleh rerat holesok xil ak ihe relingi, ma taxeak tang, isuholuk pe metom.”
12 Iahova biteni mini bit, “Bos tang. Namaen holesok xil vus nan di e hem. E onatuxol tenben ti.” Di, Temat mitamea ba.
13 Vatei, horamue na Siob xil di langganien vituei e tim sa tua nae xa be muimol e xil. 14 E melele nen ak, eloheoh tei miloh be visal Siob e biteni mini bit, “!O suv li! Xamem di matepol ni buluk sam xil di latetei tan, e dongki sam xil mun dit lateanien sangas visal xamem. 15 Di, matemanin, e mol-Saba xil lamei, e labas vin moletin te polien nam xil e lakan ni vongoro sam xil vus. Inou li kestang iaxa nalesae tengan mei namit mese ni minuk.”
16 Melele xa di tamu misepin, moletin tei mun te polien nan bemei visali e biteni mini bit, “Moletin te polien nam xil di latelaxat sipsip sam xil, e veta tei li milangas nggo ut nesao, e mei da vin xil vus. Inou li kestang iaxa nalesae tengan mei namit mese ni minuk.”
17 Xi mun tasepin ti mu vavus, e tei mun teisav bemei e biteni mi Siob bit, “!O suv li! Moletin te kanen xil langgo kantri tahal Kaldea mei ladipas xil labe vanute tol. Di, laloh ve xamem. Xil mei lasal vin moletin xil vus te polien nam ni tiei te vaeen nae xil, e laleh vuol ni kamel sam xil vus. Inou li kestang iaxa nalesae tengan mei namit mese ni minuk.”
18 Xi mun tasepin ti mu vavus, e tei mun bemei e biteni bit, “Horamue nam xil li del atuli nam xil di lateanien vituei e tim sa tua nae xa be muimol. 19 Matemanin, e votiang tei xa mahulong mitamea nggo uruvuol bemei e mei bas tan ni nim xa ladi en. E horamue nam xil vus li lalel. Inou li kestang iaxa nalesae tengan mei namit mese ni minuk.”
20 Melele xa Siob milong holesok xil vus ak, xi milong misa pupu. Ma midal pas eising nan e mikot hilin be vatumas. Di, mitingeiril be tan e mot mi Hi. 21 Xi biteni bit, “Melele xa latepes nou, inou nateka hon tang. E melele xa nimat, ma nika hon mun tang niha. Iahova tesa holesok xil vus minou, e xosali, mileh rerat rilomun ni be reling nou. E inou niti ni ngan taxa ti nipet rat his Iahova.”
22 Tave ti neta xa holesok xil xa misa xiak testal mi Siob, xi tenapol ni ti neta vasa mu vahit neta tova xa misa vaha mi Hi.