Southeast Ambrym Bible Levitikas 1
Levitikas
1
Iahova Misa Rae Nan Xil Usil Sexien te Sanien Eo Xil
Levitikas 1:1-9
Melele xa Iahova de Nim Tavolin, xi mikes Mosis be visali e biteni mini bit, “Ha usepin mi mol-Isrel xil e usa rae navan xil mi xil usil sexien xa ti lipol ni sanien eo minou ixo en. Uhiteni mi xil uhit, 'Melele xa moletin tei isa vongoro tei ihe sanien eo minou, xi ihur buluk, sipsip, mu nani tei san. E xosxa sanien eo nan ihe buluk, ma ihosei ngan xa be bul xa neta ti taxula. Ti, iteli imei e puiteh te Nim Tavolin tengan inou, Iahova, nipusi xa momal e rin xa nan. Moletin ak iling hen e vat buluk ak tengan ipisen ni xa miling tesaen nan xil en. Ma melele xa buluk ak imat, inou nipusi xa moletin ak mei imal pe metok e niketeh ihos rilomun ni. Xi ihas buluk san e rute ak ixoni xa di pol ni pe met Iahova, e nat Eron xil xa labe pris lileh re buluk ak e lipisen ni minou. Ti, livuil ni iha xat rin xil vus te hor te sanien xa de visal puiteh te Nim Tavolin. Ti, moletin ak imulul hilbe buluk ak e ita len ni. Ti, pris xil liso kuh ap ihe xat hor te sanien tengan lisahan upang ita en. Ti, liling kuh vat buluk ak, koumur nen xil, itel hisi sav xil teni. Ti, moletin ak ikas motin le buluk itel tinen xil, e pris xa di pol ni sanien ak ilehi e ha itin lelen xil vus e hor te sanien. E melele xa eas teni ihe nesao, inou, Iahova, nipongos vo sanien eo ak e nihesi nou ven.'”
 
Iahova bit kila mi Mosis sexien xil xa moletin ikila isa sanien sav xil mun ixoni sipsip, nani mu mae xil mini. Iahova biteni xa moletin xil lisa ni mi pris xil e ha lihas vin xil. Ti, litin lelen xil e hor te sanien. Sanien eo xil ak ipol ni Iahova iketeh ihos mi xil, e liti e tomat itela.