20
Eilep Xil na Siu Xil Labit Lakil ti Visi Iaxa mae ni Iesu Di Pol ni Polien Nan
Luk 20:1-8
Vatei, melele xa Iesu di pispisi mi moletin xil e di misetu ni longeongen hos e Nim Eo na Hi, vat xil na pris xil, tisa xil te Rae xil na Mosis, e elda xil mun lamei lasisi labitene, “?Hiteni mi xamem, xouk di opol ni mak veneh? ?Visi iaxa misilak, mei di opol ni polien xil ak?”
E Iesu bit rilomun ni mi xil bitene, “Itiamu, nisis pilei neta tei mi xamim. ?Muhiteni minou, visi iaxa tesil Sion mei di tekas moletin xil, Hi mu moletin tang?”
E xil di lasel mi xil mun tang labitene, “?Rihit itep? Xosxa rihit, ‘Hi iaxa misila,’ ma xi ihit rilomun ni ihitene, ‘?Veneh ma mutake reitin ti e pispisien na Sion?’ E xosxa rihit, ‘Moletin tang tesila,’ ma vanut moletin xil ak lihop xir vengan xil laneket xa Sion be provet tei.” Misak ni xil labit rilomun ni mi Iesu labitene, “Matakil ti visi tesila.”
Ma Iesu biteni mi xil bitene, “Mak, ma inou mun nasakras namit visi iaxa di misil nou mei di napol ni polien xil ak.”
Iesu Dei Vole Usil Moletin Xil xa Lalaxat Urvatiei te Grep
Luk 20:9-18
Di, Iesu dei vole ak mi moletin xil bitene, “Vatei, moletin tei milih urvatiei tei te grep. Milihi bus, xi milingi de he rut moletin xil tengan ti lilaxati. Di, hortan te urvatiei ak be ut tei xa be sotin, e ba dak be nousav. 10 Melele xa melengien pipin tengan laleh viton huit grep xa men, hortan ak misil eloheoh nan tei ba tengan vasis xil lisa ti huite san mini. E moletin tesa xil ak, xa di lalaxat urvatiei ak, labas purun eloheoh nan. Xil langgol rati ba, e taxur pas huite tova vari. 11 Ma hortan te urvatiei ak misil eloheoh tei mun ba, e moletin tesa xil ak labasi mun e lapol ni unounen mini. Di, latasa ti huite mini e langgol rati ba. 12 Di, misil eloheoh xa be tol nen ba, e moletin tesa xil ak labasi mun, di, langgol rati ba.
13 “Ma hortan te urvatiei ak minemi bit, ‘?Nipol ni itep sung? !Aha! Nisa natuxuli xati xa eheien navan da en iha. Nanemi nabit xi sung, limerere ni.’
14 E melele xa moletin tesa xil ak lapusi bemei, xil lasem xil labitene, ‘?Mupus ti? Ngan ak be horamue nan xati vari xa urvatiei te grep ak mei ite hen. !Ravasi vamat! !Imak, ma rute ak ihe sar sung!’ 15 Misak ni, laso rati ra urvatiei ak, e labasi mat.”
Di, Iesu misis moletin xil bitene, “?Midep? ?Hortan te urvatiei ipol ni itep mi moletin tesa xil ak? 16 Nabiteni mi xamim, xi ipol ni imak, imei ihas xil lilel, ti, imae ni urvatiei te grep san mi moletin sav xil lilaxati.”
E melele xa moletin xil lalonge mak labiteni mini labitene, “!Ei, misakras vari tang!”
17 Iesu miketeh pus xil e misis xil bitene, “?Maxani, veneh ma Vanuvei na Hi biteni mak bitene,
'Hat tei xa lapol ni nim ni
xa moletin xil te polien labit misa e laso ni ba,
xi vari bemei bos mak mu mili hat teisav xil.'*
 
18 Ti, moletin tei xa isavut e imot ita xat hat ak, sin imavul tova tang! E xosxa hat ak imot ita xat moletin tei, ma moletin ak imat vari.”
19 Melele xa tisa xil te Rae xil na Mosis del vat xil na pris xil lalonge mak, vatakes lasak pisi xa ladal xat Iesu vengan xa lakila xa Iesu di misepin misa xat xil nggo vole ak. E uli mikan ni moletin xil xa ladi xorelisi vehakut.
Sispileien ve Rin xa Langgal Takis
Luk 20:20-26
20 Ma tisa xil te Rae xil na Mosis del Vat xil na pris xil lalang ves suse tengan lavur xat Iesu vaxo en. Misak ni xil lasil moletin xil te luvosen tengan lihe visal Iesu ixoni moletin hos xil. Xil labit lava lasis Iesu ni neta holu tengan lapol ni vasepin ni neta tova xa vasa, vasak ni xil lakila laling Iesu e he kavmen tahal Rom. 21 Moletin xil ak te luvosen labiteni mi Iesu labitene, “Tisa, xamem makila xa naha xa xouk di obiteni mu di opispisi ni momal tevi. Xamem makila mun xa xouk opus moletin xil ngasen lapin tang, ngan xil xa latellep del moletin votei xil mun. E xouk di opispisi mi xil vus usil suse te reitinen xa Hi ien bei moletin xil lihusili. 22 Mak, ma xamem iemem bei makil ti, e rin xa manggal takis ba mi Sisa tahal Rom, manggur xoteh Rae nar, mu matahur xotehi ti?”
23 E Iesu mile kil luvosen nae, ma biteni mi xil bitene, 24 “!Sa mani tova te takis minou! ?Nanao e his visi iaxa da en?
E xil labitene, “Na Sisa.”
25 Ma Iesu biteni mi xil bitene, “Ma naha xa be na Sisa, musa rilomun ni mini. !E naha xa be na Hi, musa rilomun ni mi Hi!”
26 E xil lamesep ni sepinien nan e misak ni ladit votei. E pe met moletin xil, lasakras lapol ni Iesu vamot e sepinien nan.
Satusi Xil Lasis Pilei Iesu Usil Melengien xa Moletin Xil Limeul Rilomun Ra Maten
Luk 20:27-40
27 Di, rut moletin xil mun xa lakes xil ni 'Satusi' latemei visal Iesu. Xil lanemi labit moletin misakras vameul rilomun ra maten. Ma labiteni mi Iesu labitene, 28 “Tisa, Mosis tetis rae ak tehe nar: ‘Xosxa moletin mat reling atou nan e horamue nalu tovuol, ma tunali sav ihur tunau ak ihe atou nan. Mak, ma isa horamue mini xa ihur his tunali xa mat tuei.’ 29 Ma vatei, tua xil labe lu e he sav (7), e ngan diamu ni xil nggur atou tei. Di, mat e horamue nalu tovuol. 30 Ma tunali xa dutou nggur atou ak. Xi mun mat, e horamue nalu tovuol. 31 Ma di, ngan xa be tol nen ngguri. Xi mun mat, e taling ti horamue. Sexien ak mistal ni tua xil vus ak. Xil ngasen lalel e horamue nae tovuol. 32 E dutou ni, atou ak mun mat. 33 ?Mak, ma e melengien xa Hi isak ni moletin xil limeul rilomun ra maten ixoni rut moletin xil di labiteni, atou ak ihe atou na visi e xil, vengan xa xil vus xa latehe lu e he sav (7) lateteli tetela?”
34 E Iesu bit rilomun ni mi xil bitene, “E ut etan ak, tiramue xil e atou xil likila liteli. 35 E melengien xil xa ti imei, ngan xil xa Hi bit meulien nae pipin e momal pe meten limeul rilomun ra maten e ut nesao, xil linateli ti mun. 36 Xil mei lixoni masxaxa xil xa lasakras lalel. E melele xa xil limeul rilomun ra maten, di pisen ni xa labe horamue xil na Hi. 37 E Mosis mun tesep mese ni tehit moletin xa mat mikila imeul rilomun ra maten. E tumulen te holiei tei xa upang tepili en xa Mosis tetis usili, xi biteni xa Hi Suv ‘be Hi na Ebraham, be Hi na Aesak, e be Hi na Siakop.’§ 38 Hi meul e be Hi na ngan xil xa lameul; tave Hi na ngan xil ti xa lamat. Hi di pus xir ngasen nggoni ngan taxa rameul radi.”
39 Rut tisa te Rae xil na Mosis lakei ba ni labitene, “!Tisa, sepinien xa osa ni mi xil momal tevi!” 40 Misak ni moletin xil, uli xil mikan tengan lasis pilei ti mun neta vaha ni.
Iesu Misis Pilei Moletin Xil Usil Kristo Be Visi
Luk 20:41-44
41 Iesu misis pilei moletin xil bitene, “?Midep? Kristo istal ixo vatimol na Suv Toto Deved itep? 42 Vengan xa Deved tasen tehiteni e kikeien tei nan tehitene,
'Hi Suv biteni mi suv navan bitene,
‘Utotan e riuk metu
43 ituxoh melele xa niling ngan xil xa di labae delak liti pe hem.’'
 
44 Deved mikes Kristo ni ‘suv nan’. ?Mak, ma Kristo istal ixo vatimol nan itep?”*
Iesu Misep Pangas Tisa Xil te Rae xil na Mosis
Luk 20:45-47
45 Melele xa moletin xil di tamu lateong ni, Iesu biteni mi moletin nan xil bitene, 46 “Muvue xat xamim ve sexien na tisa xil te Rae xil na Mosis. Xil iexil bei ti lasing ni eising xil xa bos e teviei vaxoni eilep xil. Xil di lasing mak e di lakapis e mesal tengan mosav xil lipus xil e likes xil itel merereen. E di lalepis von toen na eilep xil xa bos e nim te pispisien. E melele xa moletin xil lapol ni anien xil xa tellep, lalepis rute xil xa bos mak mu. 47 E suse te xuxusen, moletin xil ak labe hokan, e di laleh holesok holu ra tunau xil. Di, e pe met moletin xil, xil di lapol ni sisen xil xa teviei. !Pangasien xa imei mi xil ihe mahulong mu ili na ngan teisav xil!”

*20:17:

20:24:

20:28:

§20:37:

*20:44: