21
Sanien na Tunau Tei mi Hi
Luk 21:1-4
Melele xa Iesu da tamu e vioh te Nim Eo na Hi, miketeh e pus moletin xil xa holesok nae xil holu di lasa sanien nae xil tengan vatutou ni polien te Nim Eo. Di, e miketeh mun e pus tunau tei xa be hoeo bemei, miso selen lu tang. Ma Iesu biteni bit, “Nabiteni mi xamim, tunau xa be hoeo iaxai misa sanien nan mili sen ngan tesav xil. Ngan tesav xil di lasa sanien nae xa be rute tang te holesok nae xil, e eilep be nae. E tunau ak xa be hoeo mak, xi misa vuol ni ngan vahe te anien en nan.”
Iesu Sep Mese ni xa Melengien Xil te Longpangasien Di Bemei
Luk 21:5-19
Rut moletin na Iesu di laketeh mikapis e vioh te Nim Eo na Hi. Lapusi xa lasak xati bos xa bos del hat xil xa minehin pupu e del sanien hos sav xil. Misak ni di lasep usili, ma Iesu biteni mi xil bitene, “Melengien tei di bemei xa lihulen sen holesok xil xa di mupusi xiak. Hat ti vari nasoh.”
Moletin xil na Iesu lasisi labitene, “?Tisa, melengien ak istal vilieh? ?E naha vari iaxa istal tengan ipisen ni xa bemei sangas?”
Iesu biteni mi xil bitene, “Muvue xat xamim. Moletin hao limei, mei lisepin e hisok lihitene, ‘!Inou nabe Kristo xa Hi tehit xati!’ E lihiteni mun lihitene, ‘Vongkor bemei sangas xiak!’ E munake reitin ti e xil e munahusil xil ti. Melele xa mulongeong ni rute tei xa bae del rute sav mun, mu moletin xil di labae mi xil mun tang, ulimim nakan ti. Sexien xil ak istal itiamu, e nave Vongkor ti mu.”
10 Xi biteni mun bit, “Ut tei xa eilep ti ivae itel ut sav mun, e suv toto tei ti ivae itel tei mun. 11 Lul ilul ixeih, mae iat moletin xil e ut xil holu, e meseien xil xa nggeih istal. An tesa xil hao istal mun, e neta xil hao listal lixo holesok xil xa di tilang hat xa isak ni moletin xil uli ikan pupu.
12 “Itiamu neta xil ak istal, moletin xil lital xat xamim e lihas pangas xamim. Liling xamim e he eilep xil te nim te pispisien xil e lisa xamim muhe nim te xeih. E musoh mun pe met suv toto xil. Holesok xil ak listal mi xamim vengan xa mube moletin navan xil. 13 Mesal namim vari xiak tengan ti muhithiten longeongen hos mi xil. 14 Ve rin ak, munanexo pupu ti ve sepinien eah xa muvue xat xamim tengan muviteni. 15 Vengan inou iaxa nisa sepinien mi xamim e nipol ni xamim mukilakil tengan moletin xil xa di laketeh misa ni xamim misakras lasa rilomun sepinien vaha xat xamim. 16 Tamemim e ninemim xil, tumim xil e vatimol namim xil mun tang, iaxa limae ni xamim muha tengan ha lihas rut xamim mulel. 17 Xil vus iexil iat xamim vengan mupol del hisok. 18 E xil lasakras lapurun meulien namim. 19 Xosxa musoh ixeih, ma muhur meulien sal.
Iesu Bit Kila xa Lihulen Hal Serusalem
Luk 21:20-28
20 Melele xa mupus moletin te vaeen xil mei likapis xol Serusalem, ma mukila xa navehi ti lihulen ni. 21 Ma ngan xil xa ladi hal Sudea lilesae lihe vathu xil. Ngan xil xa ladi hal Serusalem lihe lingi, e ngan xil xa ladi ut sav xil e hal Sudea misakras ladilomun lamei en. 22 Melengien xil ak ihe ‘Melengien xil te Longpangasien’ xa Hi ipol ni mei istal ixoni naha xa tehit xati e Vanuvei nan. 23 E melengien xil ak, isa pupu mi atou xil xa ladi e ngan xil xa di latunat ni tuvava xil. Melengien xil xa nggeih pupu istal e rute ak, e moletin xil ak lilong pangas xil pupu. 24 Litil vin rute xil ni tiei te vaeen. E rute ngan xil livar xat xil e lileh xil ha liti pe he suv te ut sav xil, e ti lipol ni polien xil xa nggeih pupu. E moletin xil xa latave Siu ti, lipel tan e Serusalem ha ituxoh melele xa Hi ihiteni ihit melengien nae ipin.
25 “Holesok xil holu istal ixo meteneai, aveti e hitu xil. E ut etan, tahe xil xa tellep limea e limavul xat ut xil ngasen. Isak ni moletin xil e ut ngasen ti linexo e ulixil ikan e melele xa lilong tahe ivang. 26 Melele xa moletin xil ngasen lipus holesok xil ak mei istal e ut etan e lipusi xa holesok xil te tilang hat di bilhiles, rute xil limermesil ve ulikanen. 27 Ti, itutou ni, lipus Nat Hi mei istal ixo momah e itel xeihen, e miehen iminahin xole. 28 Melele xa holesok xil ak mei istal, musoh mal e mupet rat vatumi ihe nesao vengan xa Hi sangas vamei tengan vateh meulien e moletin nan xil.”
Iesu Dei Vole Usil Vatiei Xil
Luk 21:29-33
29 Di, Iesu dei vole ak mi xil bitene, “Munem pis vatit re e vatit homel. 30 Melele xa luso roroh, mukila xa melele bemei sangas tengan lalih naho hu te huram. 31 E suse nen mun tak, melele xa mupus holesok xil ak ti istal, mukila xa melengien bemei sangas xa Hi imei ihe suv toto na moletin xil vus.
32 “Nabiteni reitin mi xamim, moletin xil xa lameul ladi lipus holesok xil vus ak mei listal. 33 Ut nesao e ut etan lalivus, e sepinien eo navan misakras vavus.”
Moletin Na Iesu Xil Livue Xat Xil
Luk 21:34-38
34 Iesu misel xat moletin nan xil bitene, “!Muvue xat xamim! Munanem pupu ti ve anien xa muva vin xamim ni vehakut, ve oei xa mumu ni vuma mutallang ni, mu holesok sav xil mun te ut etan ak. Maxani, melengien xa Nat Moletin itilomun en mei nastal nahe te temanin en mi xamim naxoni voh. 35 Vengan melengien ak mei istal mi moletin xil ngasen e ut etan. 36 Ti muvue xat xamim e ti musis vehakut. Mak, ma muhur xeihen tengan muhur xat meulien namim ituxoh xoxalit melengien xil xa nggeih xiak. E munave unoun ti e melele xa muha musoh pe met Nat Moletin.”
37 E vehakut, Iesu di pispisi mi moletin xil e Nim Eo na Hi. E melele xa vongien bemei, xi ba di pat e Vathu te Urvatiei te Olip. 38 E makoe roroh xil ngasen, moletin xil di labe Nim Eo na Hi tengan lateong ni.